無聊對話之大白狗

某日﹐ 某公園。。。

老婆:老公﹐你睇下嗰邊。。。 有隻好大嘅狗。 嘩﹐白雪雪架﹗ 唔知係乜嘢狗嚟嘅呢 (指品種)﹗?

老公:邊到呀?

老婆:(手指指) 嗰邊呀。。。

老公:噢 (終於睇到)﹐嗰隻呀。 嗰隻咪係。。。 咪係大白狗囉﹗﹗﹗﹗

老婆: 。。。 (無語。。。嘔血中。。。)

報告隊長。。。

我同老公每日都會通數次電話﹐ schedule如下:

Mon - Fri

9:30am : 我打比老公叫醒佢
12:45pm : 食完午餐嘅我打比老公
4:45pm : 放工嘅我打比老公
7:30pm : 放工嘅老公打比我

Sat - Sun

Anytime : 瞓醒覺嘅我打比老公
Anytime : 老公得閒時就會打比我

因為我返工時間比較定時﹐所以mon - fri多數都會係我打比佢。 逢weekend佢比較忙﹐所以我就會等佢得閒打比我。

呢個schedule喺係我哋拍拖時不知不覺定下﹐ 一直到依家。 其實我一啲都唔覺得係因為大家要向對方"報告行蹤"而打比對方﹔ 反而係可以喺一日唔同時間聽聽對方嘅聲音﹐知道對方忙唔忙﹔ 再加上一兩句鼓勵嘅說話或笑話﹐會令自己同對方開心一啲。 有時候唔一定係要講"我愛你"﹔ 令對方唔需要擔心我﹐亦都係我愛老公嘅方法之一。

無聊對話

1)
老公: 等我睇下煲紅豆沙得未先。
老婆: 點解你淨係睇煲紅豆沙又唔睇下我啊?
老公: 你又唔係啲紅豆﹗ 如果你俾野煲住﹐我咪嚟睇你囉!

2)
老婆: 點解你唔買下多啲衫啊?
老公: 依家又唔駛追女仔﹐買咁多衫做乜啊!?

3)
老婆: 頭先拎蝦片食嗰時﹐俾個罐剔親啊﹗ 不如等我食晒啲蝦片報仇!
老公: 正確嚟講﹐係個罐剔親你。 所以你應該食咗個罐報仇!